經濟數據強勁 都唔係投資好消息？

標題講嘅係由彭博社公布嘅美國經濟驚喜指數，自第2季開始數據都出乎預期地好，令到市場對經濟衰退嘅憂慮持續下降，加上早前嘅加息預期回落，所以環球股市喺6、7月期間一度齊齊造好。

但經濟數據咁好，原來都可能出現危機？經濟數據好，係咪代表實體經濟真係出現擴張？高利率嘅滯後效應，又會唔會影響實體經濟嘅擴張延續性？

畢竟現時利率高企，如果講周期性股份受惠上一輪投資利好氣氛，咁嚟緊持續性高利率，就會對企業經營帶嚟頗大嘅壓力。

經營利潤係咪足夠？能否償還貸款或者債券利率？貸款利率上升，企業又要點樣支撑經營？投資者可能覺得只要企業夠大，就唔會受影響，但唔好忘記近期嘅內房危機，其實都係受利率上升影響。

所以大家下半年嘅投資策略，最好應該攤分一下風險，尤其部分周期性股份，最好換馬去防守性股份。

而且美國聯儲局一直暗示仲有加息壓力，務求壓低通脹，所以高利率狀況將會維持，大家千祈唔好因為市場預期有救市行動就衝入市。

（本欄逢周四刊登）